Quba Destinasiya Menecmenti Təşkilatı ictimaiyyətə təqdim edilib

İyunun 21-də Dövlət Turizm Agentliyi və Azərbaycan Turizm Bürosunun təşkilatçılığı ilə Quba Destinasiya Menecmenti Təşkilatının ictimaiyyətə təqdim edilib.

Agentlikdən Frame.az-a bildirilib ki, tədbirdə Dövlət Turizm Agentliyinin sədri Fuad Nağıyev çıxış edərək təmsil etdiyi qurumun regional turizmə böyük önəm verdiyini və regionlarda turizmin inkişaf etdirilməsinin əsas məqsədlər sırasında olduğunu diqqətə çatdırıb.

O, ilk pilot layihə olaraq Destinasiya Menecmenti Təşkilatı üçün Quba və Qusarın seçilməsinin təsadüfi olmadığını, bu rayonların Azərbaycana gələn turistlərin ən çox üz tutduğu rayonlar sırasında yer aldığını bildirib. Agentliyin sədri layihənin davamı olaraq Şəkidə də Destinasiya Menecmenti Təşkilatının açılacağını söyləyib.

Azərbaycan Turizm Bürosunun baş icraçı direktoru Florian Zenqstşmid gələcəkdə turizm potensialı yüksək olan digər rayonlarda da bu növ idarəetmə modellərinin tətbiqinin planlaşdırıldığını qeyd edib. O, həmçinin cənub bölgəsində Lənkəran, qərb bölgəsində isə Gəncə şəhərində Destinasiya Menecmenti Təşkilatının fəaliyyətə başlayacağını açıqlayıb.

Destinasiya Menecmenti Təşkilatları regionların turizm potensialını daha effektiv istifadə etmək, regional turizmin təbliğatını aparmaq, bununla da uzunmüddətli davamlı iqtisadi inkişafa nail olmaq məqsədilə yeni idarəetmə modeli olaraq fəaliyyət göstərəcək. Həmçinin qeyd olunan təşkilatlar yerli səviyyədə dövlət, özəl sektor və əhali arasında əlaqələrin qurulması və insan resurslarının inkişaf etdirilməsi və standartların hazırlanmasına xidmət edəcək.

Bir cavab yazın

error: Mətndən istifadə etmək qadağandır!
%d bloqqer bunu bəyənir: