EventsIqtisadiyyatMobil dünyaTəqdimat

Türkiyənin İstanbul Texnoparkı ilə Azərbaycanın İnnovasiyalar Agentliyi əməkdaşlıq edəcək

Ölkə başçısının göstərişi ilə Qarabağda abadlıq işlərinin aparılmasına başlanılıb. Qarabağ hər zaman ilk öncə mədəniyyət ocağı, şairlərin, musiqiçilərin və incəsənət xadimlərinin vətəni olub. Qarabağın yeni tarixi yazılarkən onu regionda həm də yüksək texnologiyalar və innovasiyalar məkanına çevirmək dövlətimizin iqtisadiyyatı və gələcək tərəqqisi üçün vacibdir.

İnnovasiyalar Agentliyindən Frame.az-a bildirilib ki, bu məqsədlə Qarabağda texnologiya parklarının, innovasiya mərkəzlərinin açılması planlaşdırılır. İnnovasiyalar Agentliyi bu yöndə öz fəaliyyətlərini davam etdirərək Türkiyənin İstanbul Texnoparkı ilə “Yüksək Texnologiyalar sahəsində Əməkdaşlıq” memorandumunu imzalayıb. Sənəddə tərəflərin gələcək birgə fəaliyyətini əks etdirən bəndlər qeyd olunub. Azərbaycanda texnologiya bilikləri səviyyəsinin artırılması və gənc mütəxəssislərin yetişdirilməsi məqsədilə mütəmadi olaraq inkubasiya və akselerasiya proqramlarının, texnologiya transferi proqramlarının həyata keçirilməsi, eyni zamanda bilik və təcrübələrin paylaşılması planlaşdırılır. Bunun üçün qarşılıqlı seminar, təlim və konfranslar təşkil edilməsi, hər iki ölkədə nümayəndəliklərinin və ən əsası isə müştərək Yüksək Texnologiyalar Parklarının yaradılması nəzərdə tutulur. Həmin parklarda ən son “soft” və “hard” elmi araşdırmaların aparılması, eyni zamanda yüksək texnoloji cihazların istehsalı planlaşdırılır. Mütəmadi təşkil olunacaq kampuslarda isə gənclərimizin və İKT sahəsinin mütəxəssislərinin bir-biri ilə ünsiyyətdə olmaları, təcrübələrini bölüşmələri və yeni ideyalarını həyata keçirmələri üçün mühit yaradılacaq.

Bu cür əməkdaşlıq müqavilələrinin bağlanmasında İnnovasiyalar Agentliyinin məqsədi Azərbaycanı regionda yüksək texnologiyalar və innovasiyalar məkanına çevirmək dövlətimizin iqtisadiyyatı və gələcək tərəqqisi üçün addımlar atmaqdır.

Qeyd edək ki, İnnovasiyalar Agentliyi daha əvvəl Türkiyənin ən böyük sənaye bölgələrindən birində yerləşən, 130 texnologiya şirkətinə dəstək göstərən “GOSB” və məşhur Bilkent Universitetinin yaratdığı “Bilkent Cyberpark” texnoparkı ilə memorandum imzalayıb.

Leave a Reply

error: Mətndən istifadə etmək qadağandır!