EventsMusiqiMədəniyyətTəqdimat

Beynəlxalq Muğam Mərkəzində görkəmli vokal ifaçısı İdris Mehdiyevin yaradıcılığı xatırlandı

Noyabrın 19-da Beynəlxalq Muğam Mərkəzində əməkdar artist, vokal sənətinin görkəmli nümayəndəsi İdris Mehdiyevin yaradıcılığına həsr olunmuş xatirə gecəsi keçdi.
Beynəlxalq Muğam Mərkəzi və “Mədəniyyət” televiziya kanalının birgə layihəsi çərçivəsində təşkil edilən tədbirdə ölməz sənətkarın həyat və yaradıcılığı haqqında videoçarx nümayiş olundu.
Tədbirdə “Mədəniyyət” televiziya kanalının direktoru Ramil Qasımov, xalq artisti Ağa Cəbrayıl Abasəliyev, əməkdar incəsənət xadimi Ruhəngiz Qasımova çıxış edərək ölməz sənətkarın ömür yolundan, zəngin yaradıcılığından danışdılar.
Bildirildi ki, görkəmli sənətkar öz bənzərsiz ifası  ilə musiqi mədəniyyəti tariximzdə özünə məxsus iz qoyub. O, musiqi sənətimizi respublikamızın müxtəlif  bölgələrində, xarici ölkələrdə qastrol səfərlərində ləyaqətlə təmsil etmiş, Radio və Televiziyanın estrada-simfonik orkestrinin müşayiəti ilə Fikrət Əmirov, Vasif Adıgözəlov, Rauf Hacıyev, Tofiq Quliyev, Emin Sabitoğlu, Oqtay Zülfüqarov, Səid Rüstəmov, Cahangir Cahangirov, Əziz Əzizli, Qənbər Hüseynli kimi korifey sənətkarlarımızın əsərlərinin parlaq və təkraredilməz ifaçısı olmuşdu.
Diqqətə çatdırıldı ki, ansambldakı xidmətlərinə görə İdris Mehdiyev 1978-ci ildə “Azərbaycan SSR-nın Əməkdar artisti” fəxri adına layiq görülmüşdü.
Xatirə gecəsində Gülarə Əliyeva adına Azərbaycan Dövlət Televiziyasının “Dan ulduzu” instrumental ansamblının, Vaqif Mustafazadə adına “Sevil” vokal kvartetinin,  Ramiz Mustafayev adına xorun  və digər tanınmış artistlərin ifasında İdris Mehdiyevin vaxtilə oxuduğu  mahnılar səsləndi.
Sonda sənətkarın həyat yoldaşı Məhəbbət Mehdiyeva tədbirin təşkilatçılarına və iştirakçılarına dərin minnətdarlığını bildirdi.
Xatırladırıq  ki, Beynəlxalq Muğam Mərkəzində muğamın, milli klassik,
etnik və  caz musiqisinin təbliği və inkişafı məqsədi ilə həyata keçirilən tədbirlər və möhtəşəm yaradıcılıq layihələri davam edir.

Noyabrın 24-də saat 19-da Beynəlxalq Muğam Mərkəzinin “Mədəniyyət” televiziya  kanalı ilə birgə layihəsi çərçivəsində tanınmış tarzən  Məmməd Ağasıyevin yaradıcılığına həsr olunmuş gecə keçiriləcək.

Frame.az

Leave a Reply

error: Mətndən istifadə etmək qadağandır!