BMT-nin Qaçqın Agentliyi ABŞ və digər donorların dəstəyi ilə Azərbaycanda qaçqınların təhsilini təşviq etməkdə davam edir

BMT-nin Qaçqın Agentliyinin (BMT QAK) təhsil sahəsindəki səyləri artıq nəzərə çarpan nəticələr verir. Belə ki, bir neçə gənc qaçqın Azərbaycanda dövlət və özəl qurumlarda ixtisasları üzrə işlərə qəbul olunmağa başlayıblar. Bununla əlaqədar, BMT QAK donorlara, xüsusən də Amerika Birləşmiş Ştatları və Almaniya Federativ Respublikasına minnətdarlığını ifadə edib. Çünki məhz onların maliyyə yardımı BMT QAK-ın qaçqınların təhsilinin və inteqrasiyasının təşviqini davam etdirməsinə imkan yaradıb.

İbtidai və orta təhsilə ödənişsiz və maneəsiz çıxışı təmin etməklə yanaşı, BMT QAK-ın Azərbaycandakı Nümayəndəliyi ildə bir dəfə bütün qaçqın və sığınacaq axtaran ailələrə məktəb ləvazimatları və məktəbli formalarının alınması xərclərini ödəmək üçün maddi yardım göstərir. Yeni tədris ilinin başlaması ilə əlaqədar olaraq BMT QAK-ın Azərbaycandakı Nümayəndəliyi məktəbə gedən hər bir qaçqın və sığınacaq axtaran uşaq üçün birdəfəlik müavinətlər paylayır. Ötən il BMT QAK Covid-19 pandemiyası zamanı onların onlayn dərslərə çıxışını asanlaşdırmaq üçün qaçqın və sığınacaq axtaran məktəblilərə 350-dən çox planşet paylayıb.

2021-ci ildə “DAFI” (Qaçqınlar üçün Albert Eynşteyn Alman Akademik Təşəbbüsü) təqaüd proqramı çərçivəsində BMT QAK-ın Azərbaycandakı Nümayəndəliyi 23 qaçqın tələbəyə təhsil haqqı və aylıq müavinətlə dəstək göstərib. Bundan əlavə, BMT QAK universitetlərdə və kolleclərdə təhsil alan daha 47 gənc qaçqın və sığınacaq axtaran şəxsin təhsil haqqını digər donorların ayırdığı maliyyə vəsaiti sayəsində ödəyib. Bundan başqa, ADA və Xəzər Universiteti kimi bəzi özəl ali təhsil müəssisələri qaçqın və sığınacaq axtaran tələbələrə tam və ya qismən təqaüdlər veriblər.

Cari ildə isə əlavə 5 qaçqın tələbə “DAFI” Təqaüd Proqramına daxil edilib, paralel olaraq BMT QAK 40-dan çox qaçqın tələbəyə illik ödənişlərini ali təhsil müəssisələrinə köçürməklə dəstək olmağı öhdəsinə götürüb.

Ötən həftə dünya liderləri BMT Baş Assambleyasında Təhsilin Transformasiyası üzrə Sammitdə təhsilin gələcəyini müzakirə etməyə hazırlaşarkən BMT-nin Qaçqınlar üzrə Agentliyi təhsilə dair illik hesabatını dərc etdi. Həmin hesabatı dərc etməklə BMT QAK uzunmüddətli didərginlik situasiyalarında fövqəladə humanitar vəziyyətlərin başlandığı andan və uzunmüddətli inkişaf planları hazırlandığı dövrdə qaçqınları milli təhsil sistemlərinə daxil etməyə çağırır. Həmçinin hesabata ön söz yazmış BMT-nin Qaçqınlar üzrə Ali Komissarı Filippo Qrandi qeyd edib ki, bir çox ölkələr son vaxtlar qaçqın şagirdlərin rəsmi milli təhsil sistemlərinə daxil edilməsi istiqamətində böyük irəliləyişlər əldə ediblər.

BMT QAK-ın Azərbaycandakı Nümayəndəsi Guido Ambroso BMT QAK-ın Azərbaycanda bütün qaçqın və sığınacaq axtaran uşaqların ibtidai və orta təhsilə ödənişsiz və maneəsiz çıxışını təmin etməsinə imkan yaradıldığı üçün Hökumətlə əməkdaşlığı və donor dəstəyini yüksək qiymətləndirib.

“Biz Azərbaycan Hökumətinin qaçqın uşaqlara öz təhsil sisteminə çıxış imkanı yaratmağa açıq olmasını yüksək qiymətləndiririk və gənc və istedadlı qaçqınların Azərbaycanda kollec və universitetlərdə təhsil almasına dəstək verməyə imkan yaradan davamlı maliyyə yardımına görə ABŞ və Almaniyaya olduqca minnətdarıq. Dövlət Miqrasiya Xidməti ilə əməkdaşlıq edərək qaçqınların bir qismini təhsilini müvəffəqiyyətlə bitirdikdən sonra işlə təmin edə bildik ki, bu əməkdaşlığa görə də həmin quruma təşəkkür etmək istərdim”, – deyə Nümayəndə bildirib.

Əfqanıstandan olan gənc qaçqın Nilab Zeynəddin Bakı Tibb Kollecini müvəffəqiyyətlə bitirdikdən sonra bu yaxınlarda “Leyla Medical Center”-də tibb bacısı kimi işə qəbul olunub. BMT QAK-ın Azərbaycandakı Nümayəndəliyi Nilaba təhsil aldığı müddətdə dəstək göstərib. Belə ki, Nümayəndəlik onun illik təhsil haqqını və nəqliyyat və ləvazimatların alınması ilə bağlı bəzi xərclərini ödəyib. Nilab “Leyla Medical Center”-dən iş təklifi alan kimi Dövlət Miqrasiya Xidməti onu əmək müqaviləsini rəsmiləşdirmək üçün zəruri olan “FİN” kodla (fərdi identifikasiya nömrəsi) dərhal təmin edib.

BMT QAK-ın Azərbaycandakı Nümayəndəliyi müvafiq milli hakimiyyət orqanları ilə əməkdaşlıq edərək bütün səviyyələrdə qaçqınların təhsilini təşviq etmək və asanlaşdırmaq üçün tədbirlər görməyə davam edir. Məqsəd Azərbaycanda qaçqınların özünü təmin etmə imkanlarını yaxşılaşdırmaq və onların cəmiyyətin sosial, iqtisadi və mədəni həyatına tam və səmərəli şəkildə inteqrasiya olunmasını təmin etməkdir. BMT-nin Qaçqınlar üzrə Ali Komissarı Filippo Qrandinin dediyi kimi, təhsil inkişafa, insan hüquqlarına və sülhə qoyulan sərmayədir. Bu baxımdan donorların dəstəyi çox vacib və təqdirəlayiqdir. Çünki bu, qəbul edən cəmiyyətlərə uğurla inteqrasiya olunacaq və ya evlərinə təhlükəsiz qayıda bildikləri zaman ölkələrini yenidən quracaq insanlara yatırılan sərmayədir.

Bir cavab yazın

error: Mətndən istifadə etmək qadağandır!
%d bloggers like this: