Gənclər və idman naziri Dünya Minifutbol Federasiyasinin prezidenti ilə görüşüb

Azərbaycanın gənclər və idman naziri Fərid Qayıbov ölkəmizdə səfərdə olan Dünya Minifutbol Federasiyasinin (WMF) prezidenti Filip Juda, Avropa Minifutbol Federasiyasının (EMF) prezidenti Borislav Aleksandrov və qurumun vitse-prezidenti Peter Kralik ilə görüşüb.

Frame.az Gənclər və İdman Nazirliyinin mətbuat xidmətinə istinadla xəbər verir ki, F.Qayıbov qonaqlara Azərbaycanda idmançılara göstərilən diqqət və qayğıdan danışıb. Səfərin Azərbaycan futbolçularına faydalı olacağına əminliyini bildirən nazir qeyd edib ki, ölkəmiz bütün beynəlxalq idman qurumları kimi, bundan sonra minifutbol idman növündə də qarşılıqlı əməkdaşlığa xüsusi önəm verəcək.

Görüşə görə təşəkkür edən qonaqlar Azərbaycanda minifutbol idman növünün inkişafının onlarda xoş təəssürat yaratdığını bildiriblər. Qeyd olunub ki, Azərbaycanda minifutbola göstərilən diqqət və qayğı bir çox ölkələrə nümunə olmalıdır. Gələcəkdə Avropa çempionatının Bakıda təşkil edilməsi məsələsinə də toxunan federasiya rəhbərləri vurğulayıblar ki, Azərbaycan dünyanın ən mötəbər idman yarışlarına uğurla ev sahibliyi edib və təşkliatçılıq sahəsində böyük təcrübəsi var.

Görüşdə nazir müavini Mariana Vasileva, Azərbaycan Minifutbol Federasiyasının (AMF) fəxri prezidenti Orxan Məmmədov, federasiyanın prezidenti Taleh Nəsibov, vitse-prezidenti Azər Hüseynov və baş katibi Orxan Hüseynov da iştirak ediblər.