İcbari Tibbi Sığorta üzrə Dövlət Agentliyinin (Agentlik) təşəbbüsü ilə ümummilli lider Heydər Əliyevin 100 illik yubileyi münasibətilə tibbi aksiya təşkil edilib.
Aksiyanın keçirilməsində əsas məqsəd xüsusi qayğıya ehtiyacı olan şəxslərin sağlamlığı ilə bağlı problemlərini erkən aşkarlamaq və ağırlaşmaların qarşısını vaxtında almaqdır.
Tibbi müayinələrə Agentlik tərəfindən Nizami Tibb Mərkəzi, 8 saylı Uşaq Poliklinikası və Gəncə Şəhər Birləşmiş Xəstəxanasının həkim heyəti cəlb edilib. Aksiya çərçivəsində Bakı şəhərində 4 uşaq sığınacağının, 1 uşaq reabilitasiya mərkəzinin, Gəncə şəhərində gender əsaslı zorakılıq qurbanlarına və əlil qadınlara dəstək göstərən 2 təşkilatın sakinləri kardioloq, ginekoloq, nevroloq, terapevt, oftalmoloq, pediatr və radioloq tərəfindən müayinə ediliblər. Aksiyada ümumilikdə 270 nəfər iştirak edib.
Bakıda uşaq və qadınların sağlamlığının ümumi vəziyyətinin dəyərləndirilməsi üçün laborator analizlər də keçirilib. Laborator analizlərin nəticələrinə əsasən bəzi şəxslərdə vitamin D defisiti müşahidə olunub. Bəzi müayinə nəticələrinə əsasən isə stasionar müayinə və müalicəyə ehtiyac yaranıb. Müayinədən keçən uşaqların bəzilərində fimoz diaqnozu, adenoid hipertrofiyası və xroniki tonzillit, anadangəlmə ürək qüsuru qulaqcıqlararası çəpərin defekti, ürək ritminin pozulması, dərialtı lipoma, kalkulyoz xolesistit və bir qadında riskli hamiləlik aşkarlanıb.
Həmin şəxslər Agentliyin dəstəyi ilə aidiyyəti üzrə əməliyyat və müalicələrə yönəldiliblər. Qeyd edək ki, riskli hamiləlik yaşayan qadın ətraflı müayinələrə cəlb edilərək qeysəriyyə əməliyyatı olunub. Ana və körpənin həyatı üçün riskli göstəricilərin olmasına baxmayaraq əməliyyat uğurla icra olunub.
Müayinə edilmiş şəxslər nəticələrə əsasən həkim təyinatına uyğun dərman preparatları və optik eynəklərlə ödənişsiz təmin ediliblər.
Gəncədə əlavə müayinə və müalicəyə ehtiyacı olan şəxslər xəstəxanaya dəvət ediliblər. Müayinə edilən şəxslərin əksəriyyətində ən çox rast gəlinən xəstəlik hipertoniya aşkarlanıb.
Vurğulayaq ki, Agentlik hər zaman həssas qruplardan olan şəxslərə xüsusi qayğı ilə yanaşır, onların vaxtında müayinə və müalicə məsələlərini diqqətdə saxlayaraq tədbirlər görür.