HORECA Pet Collection layihəsi genişlənir

Coca-Cola Azərbaycan, “ASAN Könüllüləri” Təşkilatı, Ekologiya və Təbii Sərvətlər Nazirliyinin birgə əməkdaşlığı ilə Bakıda keçirilən HORECA Pet Collection ekoloji layihəsi davam edir. Coca-Colanın “Tullantısız Dünya” proqramının tərkibində icra olunan layihə HORECA (hotel, restoran, kafe) üzrə fəaliyyət göstərən müəssisələrdən plastik tullantıları toplamağı nəzərdə tutur.

Layihənin icra olunmasında məqsəd istifadə olunmuş plastikləri təkrar emala yönləndirmək və bu xammalın ətraf mühitə təsirini azaltmaqdır. Artıq 11 aydır həyata keçirilən layihəyə Bakı şəhəri ilə yanaşı regionlarda yerləşən müəssisələr də cəlb olunub. Hazırda layihə Bakı, Abşeron, Sumqayıt, Mingəçevir və Qəbələni əhatə edir. 

Bakı, Abşeron və Sumqayıt ərazisində fəaliyyət göstərən 135 müəssisə, Mingəçevir və Qəbələdən isə hazırda doqquz müəssisə layihəyə qoşulub. Ümumilikdə 35 tona yaxın plastik toplanaraq təkraremal müəssisələrinə yönləndirilib. 

İlkin dövrlərdə restoranlarla icra olunan layihəyə, Bakının ən iri ticarət mərkəzləri olan Gənclik Mall, Dəniz Mall, təhsil müəssisələrindən Bakı Dövlət Universiteti, Azərbaycan Dövlət Memarlıq və İnşaat Universiteti, Odlar Yurdu Universiteti, Xəzər Universiteti, Dövlət Sərhəd Xidmətinin İdman Kompleksi, ASAN Xidmət Mərkəzləri, Park Cinema, CinemaPlus kinoteatrları, avtoservislər, “Shaurma N°1” və ‘’Cafe City” restoranları da qoşulub. Müəssisələrə plastik tullantılar üçün qutular yerləşdirilib, həmçinin insanların maarifləndirilməsi üçün müxtəlif məlumatlandırıcı vasitələr paylanılıb. 

Coca-Cola Azərbaycanın baş direktoru Rəna Məmmədova bildirib ki, Coca-Cola fəaliyyət göstərdiyi ölkələrdə plastik tullantıların təsirinin azaldılması üçün davamlı layihələr həyata keçirir: “Coca-Cola olaraq biz 2030-cu ilə qədər qablaşdırmalarımızı 100% təkrar emal etmək və plastik qablaşdırmalarımızda ən azı 50% təkrar emal edilmiş materialdan istifadə etmək öhdəliyi götürmüşük. Plastik tullantıların təbiətə təsirini azaltmaq üçün istehsalatda plastiklərin miqdarını azaltmaq kifayət deyil. Buna görə də fəaliyyət göstərdiyimiz bütün ölkələrdə istehlakdan sonra təkraremal məqsədilə yığım proqramlarına başlamışıq. Bu istiqamətdə Azərbaycanda həyata keçirdiyimiz “HORECA Pet Collection” layihəmizə qouşlan müəssisələrin sayı gündən-günə effektiv şəkildə artır. HORECA müştərilərimizin, eləcə də yerli əhalinin proqrama göstərdiyi diqqətdən məmnunuq”.

Qeyd edək ki, “Tullantısız Dünya” proqramı çərçivəsində Coca-Cola 2030-cu ilə qədər bazara çıxardığı bütün qablaşdırmaları toplayıb təkrar emal etməyi hədəfləyir.

Xatırladaq ki, Coca-Cola Azərbaycan bundan əvvəl də “ASAN Könüllüləri” Təşkilatı, Ekologiya və Təbii Sərvətlər Nazirliyi  və digər tərəfdaşlarla birlikdə ekoloji isitaqmətdə  “Təmiz Ölkəm”, “ Təmiz Sumqayıt”, “Xəzəri Qoruyaq” kimi bir sıra layihələr icra edib. Ümümilikdə həmin layihələrdə 50 tondan çox tullantı təkrar emala qaytarılıb.

 

 

Bir cavab yazın

error: Mətndən istifadə etmək qadağandır!
%d bloggers like this: