Milli İncəsənət Muzeyində tanınmış fırça ustası Hafiz Məmmədovun sərgisi açılıb

Azərbaycan Milli İncəsənət Muzeyində Əməkdar incəsənət xadimi, tanınmış rəssam Hafiz Məmmədovun anadan olmasının 100 illiyinə həsr olunmuş sərgi açılıb.

Mərasimdə çıxış edən mədəniyyət naziri Anar Kərimov rəssamın həyat və yaradıcılığından danışıb. Bildirib ki, rəssamlıq sənətimizin inkişafında böyük xidmətləri olan Hafiz Məmmədovun 100 illiyi pandemiya dövrünə düşdüyündən sərgi bu gün təşkil olunur: “Rəssamın Azərbaycan təsviri sənətində qoyduğu iz və sənətinin miqyası onun yaradıcılıq mirasının gənc nəslə təbliğ edilməsi üçün əsas verir. Sərgidə tamaşaçılar təsviri sənətin əksər janrlarında əsərlər yaradan rəssamın irsini daha dərindən tanıyacaqlar. Burada rəssamın Dövlət Rəsm Qalereyası və Milli İncəsənət Muzeyində qorunan əsərləri təqdim edilir. Dövlət Rəsm Qalereyasında qorunan əsərlərin bir qismi bərpa olunaraq sərgiyə çıxarılıb. Bu əsərlərdə sovet dövrünün ab-havası və həqiqətləri əks olunub. Rəssam bir çox xarici ölkələrdə Azərbaycanı təmsil edib. H.Məmmədovun Misirdə ezamiyyətdə olduğu zaman yaratdığı bir-birindən maraqlı əsərlər xüsusilə diqqəti çəkir. Sevindirici haldır ki, rəssamın mirası qorunur, nəsildən-nəslə ötürülür. Bir müddət əvvəl rəssamın qızı, tanınmış rəssam, UNESCO nəzdində Beynəlxalq İncəsənət Assosiasiyası, Beynəlxalq Plastik Sənətlər Assosiasiyası və Bakırköy Rəssamlar Dərnəyinin (İstanbul) üzvü Lətafət Məmmədovanın Müasir İncəsənət Muzeyində sərgisi təşkil edildi və maraqla qarşılandı”.

Nazir, həmçinin dövlətimizin hər zaman rəssamlara və ümumilikdə sənət adamlarına diqqət və qayğı ilə yanaşdığını vurğulayıb. Bildirib ki, Birinci vitse-prezident Mehriban Əliyeva mədəniyyətimizin hamisi kimi həm ölkə daxilində, həm də beynəlxalq aləmdə mədəniyyətimizin təbliği istiqamətində çoxsaylı layihələrin reallaşmasına əvəzsiz töhfələr verir.

Tədbirdə çıxış edən Rəssamlar İttifaqının sədri, Xalq rəssamı Fərhad Xəlilov Hafiz Məmmədovla bağlı xatirələrini bölüşüb. Qeyd edib ki, Azərbaycan təsviri sənətində öz yeri olan rəssam çox mədəni, xoşniyyətli bir insan idi: “Onun həyatı o qədər də asan olmayıb. Rəssamlıq Məktəbini bitirəndən sonra könüllü olaraq müharibəyə gedib. Həlim xasiyyətli Hafiz müəllimin iradəsi güclü idi. Müharibədən qayıtdıqdan sonra V.İ.Surikov adına Moskva Dövlət Akademik Rəssamlıq İnstitutunu bitirib. Bir müddət Rəssamlıq Məktəbinin müdiri işləmişdi. Çoxları onu özünə müəllim hesab edirdi. O, ictimai həyatda da çox fəal iştirak edirdi. Bütün bunlarla bərabər, Hafiz müəllim rəssam kimi əvəzsiz idi. Biz bu gün rəssamın sənət dünyası ilə bir daha görüşüb onunla dialoqa girə biləcəyik. Sərgi münasibətilə bütün qonaqları və ailə üzvlərini təbrik edirəm”.

Azərbaycan Dövlət Rəssamlıq Akademiyasının prorektoru, Xalq rəssamı Səlhab Məmmədov və Əməkdar rəssam Eldar Qurbanov Hafiz Məmmədovla bağlı xatirələrini dilə gətiriblər. Rəssamın müəllim kimi xüsusiyyətləri, insani keyfiyyətlərindən danışaraq onu ehtiramla yad ediblər.

Hafiz Məmmədovun qızı Türkiyədə yaşayan rəssam Lətafət Məmmədova çıxış edərək sərginin təşkilinə görə təşəkkürünü bildirib. Diqqətə çatdırıb ki, sərgidə ailə arxivindən olan əsərlər də nümayiş olunur: “H.Məmmədovun əsas mövzusu həmişə Azərbaycan idi. Bir müddət Misirdə yaşadığı üçün orada yaratdığı əsərlər də sənətində xüsusi bir xətt olaraq keçir. Atamın yarımçıq qalan işləri də qorunur”.

Təsviri sənətə gəlməsində atasının rolunu vurğulayan rəssam bu gün yaratdığı əsərlərdə onun da xəttinin özünü göstərdiyini vurğulayıb.

Daha sonra qonaqlar sərgi ilə tanış olublar.

Sərgidə rəssamı məişət janrda işlədiyi “Yay günləri”, “Gözləmirdim”, “Mixaylonun vətəni Novxanı kəndi”, “Doğma yerlər”, şair Əliağa Vahidin, tarzən Hacı Məmmədovun və digərlərinin portretləri nümayiş olunub.

Sərgi noyabrın 3-dək davam edəcək.

Qeyd edək ki, 1921-ci ildə Bakının Sabunçu qəsəbəsində anadan olan Hafiz Məmmədov 1941-ci ildə Bakı Rəssamlıq Məktəbini bitirib. 1959-1973-cü illər ərzində Misir, Sudan, Livan, İraq, Suriya, Mərakeş, Tunis, Macarıstan və Rumıniya və digər ölkələrdə keçirilən sərgilərdə ölkəmizin rəssamlıq sənətini təbliğ edib. O, uzun illər pedaqoq kimi çoxsaylı gənclərin bu sahədə yetişməsində xidmətlər göstərib. Tanınmış rəssam 1995-ci ildə vəfat edib.

 

Bir cavab yazın

error: Mətndən istifadə etmək qadağandır!
%d bloggers like this: