Şokoladı sevməyən demək olar ki, yoxdur…
Sovet dönəmindən qalma və bu günlərdə də öz aktuallığını itirməyən bir fikir var xalqımızda. Nədənsə çoxları xaricdə istehsal olunmuş məhsullara üstünlük verir. Bəs siz bilirdinizmi bizim doğma Azərbaycanımızda istehsal olunan şokoladlar və konfetlər elə həmin xaricdə qızıl və gümüş medala layiq görülüb? Elə isə yollanırıq Azərbaycanda bu şokoladları istehsal edən Şirin Qənnadı Fabrikinə. Qeyd edək ki, Şirin MMC 2006-cı ildən fəaliyyət göstərir, Almaniya və İtaliya istehsalı olan və yüksək standartlara cavab verən avadanliqlarla təchiz olunmuşdur. Əməkdaşlarımız yaxın günlərdə fabrikin qonağı oldu. Səmimi və mehriban kollektiv bizi gülərüzlə qarşıladı və Şirin dünyaya səyahətimiz başlandı.
Fabrikin sahəsi çox genişdir. Burada draje konfetlər üçün ayrı, şokoladlı, karamel konfetlər üçün ayrı sexlər quraşdırılmışdır. İstehsal tam avtomatlaşdırılmış şəkildə həyata keçirilir. Görünür, elə bu səbəbdən də məhsullara əl ilə toxunulmasına istehsal zamanı heç yerdə rast gəlmədik. Fabrikdə çalışan bütün əməkdaşlar gigiyenik geyimlərdə, səliqəli və təmiz alətlərlə çalışır. Bütün istehsal sahələrində ciddi nəzarətin olmasını qonaq olmağıma baxmayaraq, hətta mən də öz üzərimdə hiss etdim – məhsul istehsal olunan ərazilərə xalatda, başına qoruyucu papaq taxdıqdan sonra keçməyə icazə verilir. Təsəvvür edin, hətta parfumeriya istifadə etmək belə olmaz! Konfetlər istehsal olunandan sonra saxlanılan anbarlar da hər gün nəzarət altındadır, hazır məhsulu sərin və işıq düşməyən yerdə saxlayırlar. Baş texnoloqun dediyinə görə, bu məhsulun həm dadının, həm də yaxşı görünüşünün qorunub saxlaması üçün vacibdir.
