EventsMədəniyyətTəqdimat

Tanınmış kino xadiminin 80 illiyi qeyd olunacaq

Yanvarın 11-də Beynəlxalq Muğam Mərkəzində tanınmış kino rəssamı, fotoqraf, Əməkdar mədəniyyət işçisi Pərviz Quliyevin 80 illik yubileyinə həsr olunan gecə keçiriləcək.

Mədəniyyət Nazirliyi, C.Cabbarlı adına “Azərbaycanfilm” Kinostudiyası, Azərbaycan Dövlət Film Fondunun dəstəyi ilə reallaşacaq tədbirdə tanınmış kino xadimləri yubilyar haqqında ürək sözlərini bölüşəcək. İncəsənət ustalarının ifasında Azərbaycan filmlərindən musiqilər təqdim olunacaq.

Qeyd edək ki, sənətkarın üç dəfə sərgisi təşkil edilib. 2013-cü ildə “Azərbaycanfilm” Kinostudiyasının 90 illik yubileyinə həsr edilmiş fotosərgi böyük maraqla qarşılanıb. O, “Azərbaycanfilm”in, Dövlət Film Fondunun, Naxçıvan Muxtar Respublikası Film Fondunun foyesinin tərtib edilməsində yaxından iştirak edib. Dövlət Film Fondunda keçirilən yubiley tədbirlərində stendlərin hazırlanmasında onun çəkdiyi fotoşəkillərdən istifadə edilir. Lentə aldığı fotolar kinoya həsr olunmuş kitab və jurnallarda, kataloqlarda, eləcə də “Kino ensiklopediyası”nda yer alıb.

Pərviz Əsəd oğlu Quliyev 1942-ci il yanvarın 19-da Bakıda anadan olub. 1961-ci ildən etibarən “Azərbaycanfilm” Kinostudiyasında laborant, daha sonra fotorəssam, usta-fotoqraf kimi çalışıb. 1967-ci ildən kinostudiyada foto sexinə rəhbərlik edib. Dəfələrlə keçmiş SSRİ məkanında keçirilən Azərbaycan mədəniyyəti günlərində ölkəmizi tərənnüm edən fotostendlərin tərtibatçısı olub. 50-dən artıq bədii, sənədli və elmi-kütləvi filmlərə fotoqraf-rəssam kimi tərtibat verib. Azərbaycan Dövlət Film Fondunun foto arxivinin əsas hissəsini fotoqrafın işləri təşkil edir. Kinostudiyanın arxivində qorunan “Bakının işıqları”, “Kəndlilər”, “Sevil”, “26-lar”, “Gilan qızı”, “Hacı Qara”, “Arşın mal alan”, “Fətəli xan” və digər filmlərin neqativlərini də fonda Pərviz Quliyev təqdim edib.

Leave a Reply

error: Mətndən istifadə etmək qadağandır!