EventsFrame LifeTanış OlaqTəqdimat

Azərbaycanın nəqliyyat, rabitə və yüksək texnologiyalar naziri Ramin Quluzadə “AmCham”ın üzvləri ilə görüşüb

Azərbaycanda Amerika Ticarət Palatası (“AmCham”) “Hewlett Packard Enterprise” (HPE) şirkətinin dəstəyi ilə öz üzvləri üçün Azərbaycanın nəqliyyat, rabitə və yüksək texnologiyalar naziri Ramin Quluzadənin iştirakı və nitqi ilə müşayiət olunan aylıq işgüzar nahar təşkil edib. Diplomatik korpusun nümayəndələri də daxil olmaqla təqribən 150 qonaq tədbirdə iştirak edib.

Tədbiri açıq elan edən Azərbaycanda “AmCham”ın prezidenti Nuran Kərimov və icraçı direktoru Natəvan Məmmədova qonaqları salamlayaraq, işgüzar naharda əsas natiq qismində iştirak edən Ramin Quluzadəyə öz minnətdarlıqlarını ifadə ediblər.

Öz növbəsində görüş üçün “AmCham”a təşəkkür edən nazir nəqliyyat, telekommunikasiya və informasiya texnologiyalarının inkişafı istiqamətində ölkə başçısının diqqət və qayğısı ilə həyata keçirilən işlər barədə ətraflı məlumat verib. Qeyd edilib ki, Strateji Yol Xəritəsi ilə müəyyən edilmiş hədəflərə çatmaq üçün Bakıda və regionlarda genişzolaqlı şəbəkə qurulur, yeni texnologiyalar – o cümlədən, LTE texnologiyası tətbiq olunur. Azərbaycanın, regionun ən təhlükəsiz DATA Mərkəzinə malik olduğunu xatırladan nazir Yevlax şəhərində Ehtiyat Data Mərkəzinin qurulduğunu bildirib. Mərkəzin fəaliyyətinin genişləndirilməsi  üçün bu yaxınlarda “Microsoft” şirkəti ilə memorandum imzalandığı diqqətə çatdırılıb.

Nazir müasir iqtisadi münasibətlər və inkişaf üçün İKT-nin tətbiqinin qaçılmaz olduğunu vurğulayıb. O, bunun üçün elektron mühitin genişləndirilməsinin vacibliyini qeyd edib: “Elektron xidmətlərin cəmləşdiyi vahid platforma olan  “Elektron hökumət” portalı vasitəsilə hazırda, ümumilikdə,  89 qurum tərəfindən vətəndaşlara 440 sayda elektron xidmət göstərilir. Bu say, təbii ki, daimi olaraq artırılır. Portalın daimi istifadəçilərinin sayı 700 mindir. Ümumilikdə elektron xidmətlərə müraciət sayı isə  60 milyonu  ötüb. Bilirsiniz ki, elektron mühitin inkişafı üçün vacib infrastrukturlardan biri də elektron imzadır. 2019-cu ildə yeni nəsil şəxsiyyət vəsiqələrinin vətəndaşlara verilməsi nəzərdə tutulur ki, bu şəxsiyyət vəsiqələrində e-imza sertifikatlarının yerləşdirilməsi təmin ediləcək. Hesab edirəm ki, şəxsiyyət vəsiqələrində e-imzanın tətbiqi elektron xidmətlərin və mühitin inkişafına çox müsbət təsir edəcək. “Elektron imza” sertifikatlarının ölkələr arasında qarşılıqlı tanınması ilə bağlı ardıcıl işlər aparılır və  inanırıq ki, bu, iş adamları üçün yeni imkanlar açacaq. İKT sektorunda həyata keçirilən işlərin nəticəsi kimi, beynəlxalq reytinqlərdə əldə etdiyimiz göstəriciləri də diqqətinizə çatdırmaq istərdim. Azərbaycan  Beynəlxalq Telekommunikasiya İttifaqının 2017-ci il üçün İKT-nin İnkişaf İndeksi üzrə hesabatında dünya ölkələri arasında 65-ci yeri tutur. İqtisadi Əməkdaşlıq Təşkilatına üzv dövlətlər arasında isə  2-ci yerdədir. Nəzərinizə çatdırım ki, Azərbaycan əhalisinin təqribən 80%-i internet istifadəçisidir və ölkəmizdə mobil rabitə abunəçilərinin sayı əhalinin 106 faizini təşkil edir”.

Sektor üzrə həyata keçirilən digər layihələrdən danışarkən nazir “Elektron ticarət”in inkişafına hesablanan “Poçt HUB” layihəsini qeyd edib. O bildirib ki, layihəyə əsasən, Çindən sifariş olunan e-ticarət  məhsulları “Silk Way” Aviaşirkəti vasitəsilə Azərbaycana gətirilir, “Azərpoçt” bu məhsulları tranzit mərkəzdə çeşidləyir və ünvanı üzrə göndərir. Hazırda dünyanın 17 ölkəsi ilə, o cümlədən ABŞ ilə bu istiqamətdə əməkdaşlıq edilir.

Azərbaycan hökumətinin təşəbbüsü ilə reallaşdırılması nəzərdə tutulan “Trans-Avrasiya Super İnformasiya Magistralı” layihəsindən danışan R.Quluzadə bildirib ki, bu il “Bakutel-2017” çərçivəsində içtirakçı ölkə və operatorlarla həlledici görüş keçirilib və layihənin reallaşdırılması üçün birgə büdcənin yaradılması tam olaraq razılaşdırılıb.

Nazir, həmçinin regionda ilk olaraq Azərbaycanda ən effektiv və müasir səviyyədə sterilizasiya aparılmasına imkan verən yüksək gücə və məhsuldarlığa malik Radiasion Sterilizasiya qurğusu yaradıldığını və  bunun iş adamlarına beynəlxalq standartlara cavab verən steril məhsullar istehsal etməyə imkan yaratdığını bildirib.

Startapçılar üçün münbit şərait və ekosistem yaradıldığını deyən R.Quluzadə bunu dövlətin innovativ iqtisadiyyatın perspektiv inkişafına ən real dəstəyi kimi qiymətləndirib. O, yeni İnnovasiya Mərkəzinin yaradılmasının planlaşdırıldığını da qeyd edib.

Azərbaycanın beynəlxalq tranzit daşımalar üçün əlverişli coğrafi mövqeyə malik olduğunu vurğulayan nazir yeni istifadəyə verilən Bakı-Tbilisi-Qars dəmiryolunu Avropanı Asiya ilə birləşdirən ən qısa və etibarlı yol adlandırıb.

“Bu gün ölkəmizdə avtomobil yolları yenilənir. Şimal-Cənub nəqliyyat dəhlizinin inkişafına investisiya qoyulur. Ələt qəsəbəsində yeni beynəlxalq dəniz limanının inşasını xüsusi  qeyd etmək istərdim. Bu layihə Azərbaycanın tranzit nəqliyyat-logistika qovşağına çevrilməsində böyük əhəmiyyətə malikdir”, – deyə nazir bildirib.

Tədbir işgüzar naharın sponsoru “Hewlett Packard Enterprise”ın nümayəndəsi Rövşən Əkbərovun çıxışı ilə davam edib. Daha sonra, “Zaman Sığorta” və “Təkrar Sığorta Broker” MMC tərəfindən təqdimatlar keçirildi.

Qeyd edək ki, Palatanın təşəbbüsü olan və Azərbaycanda “AmCham” tərəfindən hər ay təşkil olunan işgüzar naharda yüksəkvəzifəli hökumət rəsmiləri, Azərbaycan Parlamentinin üzvləri və diplomatik korpusun nümayəndələri iştirak edirlər.

Amerika Ticarət Palatası Azərbaycanda xarici və yerli biznesin maraqlarını dəstəkləyən və təşviq edən özəl, qeyri-kommersiya əsaslı aparıcı ticarət-sənaye assosiasiyasıdır. 1996-cı ildə yaradılmış “AmCham Azərbaycan” iqtisadiyyatın hər bir sektorunda fəal olan 280-dən çox daimi üzvdən və müxbir üzvdən ibarətdir. Azərbaycanda “AmCham” ölkədə bütün xarici investisiyaların təxminən 80%-ni, eləcə də yerli investisiyaların mühüm bir hissəsini təmsil edir.

Frame.az

Leave a Reply

error: Mətndən istifadə etmək qadağandır!