Bakıda “Dosso Dossi Fashion Show” tekstil sərgisi keçiriləcək

Sentyabrın 16-18-də Bakıda Türkiyənin ən böyük moda şousu olan “Dosso Dossi Fashion Show” tekstil sərgisi keçirəcək. Sərgidə Türkiyənin ən məşhur tekstil şirkətləri öz məhsullarını nümayiş etdirəcəklər. Tədbir çərçivəsində Rusiya estradasının məşhur ulduzlarının konsertləri və “party”lər təşkil olunacaq.

“Flame Towers” hotelinin “Balo” zalında keçiriləcək “Dosso Dossi Fashion Show” sərgisində Türkiyənin 40 tekstil şirkətinin nümayiş etdirəcəkləri məhsullar Azərbaycan alıcılarının tələbatına tam cavab verir. Sərgi Türkiyənin məşhur tekstil markaları ilə 30 ölkədən gələn hazır geyim topdan satış nümayəndələrini bir araya gətirərəcək.Sentyabrın 16-da qapılarını ziyarətçilərin üzünə açacaq “Dosso Dossi Fashion Show” sərgisində Azərbaycan və qonşu ölkələrdən olan qonaqlar da daxil olmaqla təxminən 4 min nəfərin iştirakı gözlənilir.

Türk tekstil brendlərinin rəngarəng məhsulları stendlərdə nümayiş olunacaq və ziyarətçilərə payız-qış mövsümünə uyğun “Arno”, “Nexx”, “Samsara”, “Gizzly Plus”, “Fimore”, “Phardi”, “Rich Line” və s.brendlərin məhsulları təklif olunacaq. Xüsusi hazırlanmış toxuculuq məhsullarını təqdim edəcək stendlər isə Türkiyə və Azərbaycan toxuculuq sənətinin nümayəndələri üçün əhəmiyyətli bir görüş nöqtəsi olacaq.

“Dosso Dossi Fashion Show” sərgisi çərçivəsində sentyabrın 17-də Bakının məşhur əyləncə meydanı sayılan “Enerji Club”da Rusiya estradasının tanınmış müğənniləri Natan və Anna Sedokova konsert verəcəklər.Sərgi sentyabrın 18-də işinə yekun vuracaq.

“Dosso Dossi”nin baş direktoru Hikmet Eraslan Azərbaycana gəldikləri üçün xoşbəxt olduqlarını söyləyib: “Ötən il “Dosso Dossi”nin moda nümayişi və konsertləri ilə Bakıda bir festival ab-havası yaşadıq. Bu gün biz yenidən Bakıda dostlarımızla birgəyik. Türk və Azərbaycan xalqları arasında bir çox ortaq cəhətlər var. Özümüzü evimizdə hiss edirik. Moda aləmi “İki dövlət – bir millət” konsepsiyasına öz töhfəsini verərək, Türkiyə ilə Azərbaycan arasında mövcud dostluq əlaqələrini bir qədər də möhkəmlədəcək”.

Qeyd edək ki, “Dosso Dossi Fashion Show”da indiyədək Adriana Lima, İzabel Fontana, Miranda Kerr, İrina Şeyk, İzabel Qular, Ana Beatriz Barros, Kendall Cenner, Lindsey Ellinqson və Erin Hiterton kimi modellərlə yanaşı “Qırmızı agent” adı ilə tanınan rusiyal; teleaparıcı Anna Çapman da iştirak edib.

Frame.az