Binokulyar korluq və binokulyar ağır görmə pozuntusu olan şəxslərin uşaq musiqi və incəsənət məktəblərində pedaqoji fəaliyyəti təmin olundu

Azərbaycan Respublikası Nazirlər Kabinetinin 2019-cu il 18 fevral tarixli 57 nömrəli Qərarı ilə təsdiq edilmiş “Pedaqoji fəaliyyətlə məşğul olmağa yol verməyən xəstəliklərin Siyahısı”na əsasən binokulyar korluq və binokulyar ağır görmə pozuntusu olan şəxslərin xüsusi təhsil müəssisələri istisna olmaqla, pedaqoji fəaliyyətlə məşğul olmaları qadağan olunurdu.

Çoxsaylı vətəndaş müraciətlərini nəzərə alaraq, Azərbaycan Respublikasının Mədəniyyət, Təhsil və Əmək və Əhalinin Sosial Müdafiəsi nazirlikləri tərəfindən birgə hazırlanmış və Azərbaycan Respublikası Nazirlər Kabinetinin 20.01.2022-ci il tarixində təsdiq olunmuş 23 nömrəli Qərarına əsasən adıçəkilən xəstəlikləri olan şəxslərin uşaq musiqi və incəsənət məktəblərində pedaqoji fəaliyyətinə icazə verilir.