Çinli turistlərin Azərbaycana kütləvi səfərləri bərpa olunur
Çinli turistlərdən ibarət qrupun Azərbaycana səfəri baş tutub. Bu, pandemiyadan sonra Çindən həyata keçirilən ilk qrup səfəridir.
Frame.az xəbər verir ki, 2019-cu ildə “Azərbaycan Respublikası Dövlət Turizm Agentliyi və Çin Xalq Respublikası Mədəniyyət və Turizm Nazirliyi arasında çinli turistlərin Azərbaycan Respublikasına qrup səfərlərinin sadələşdirilməsi haqqında memoranduma əsasən Azərbaycan çinli turistlərin səyahət edə biləcəyi ölkələr siyahısına salınıb.
Növbəti illərdə Çində marketinq və təbliğat işlərinin intensiv olaraq bərpa edilməsi, çinli turistlərin sayının artırılmasına yönəlmiş tədbirlərin keçirilməsi nəzərdə tutulur. Çin Xalq Respublikası vətəndaşları üçün sadələşdirilmiş viza rejimi çərçivəsində “ASAN Viza” elektron sistemi tətbiq olunur. Hazırda Urumçi şəhərindən Bakıya həftədə bir dəfə olmaqla uçuşlar həyata keçirilir.
2023-cü ilin ilk rübündə Çindən ölkəmizə 1279 nəfər səyahət edib ki, bu da ötən ilin eyni dövrü ilə müqayisədə 3.5 dəfə artım, 2019-cu ilin eyni dövrü ilə müqayisədə isə 40 faiz bərpa deməkdir.
