“Özün yarat” yarışmasının qalibləri məlum olub

Ekologiya və Təbii Sərvətlər Nazirliyi, Avropa İttifaqı (Aİ) və BMT-nin İnkişaf Proqramı (BMTİP) “Özün yarat” yarışmasının qaliblərini elan edib.

BMTİP-nin Azərbaycan ofisindən Frame.az-a verilən xəbərə görə, birinci yerin qalibi (3000 AZN) plastik çirklənmə probleminə dayanıqlı həll yolunu hədəfləyən “Plastik çantalar” layihəsi ilə Leyla Məmmədova olub.

İkinci yerin qalibi (2000 AZN) lazımsız metal hissələrdən daşına bilən manqal hazırlayan Səid Əliyev olub.

Üçüncü yerin qalibi isə (1000 AZN) köhnə metal çəlləyi hər evdə istifadə edilə biləcək rəngarəng əlüzyuyana çevirərək müsabiqəyə qatılan Kamran Qasımzadə olub.

Dördüncü yeri, qatıq hazırlamaq üçün parçalardan istifadə edərək yeni məhsul hazırlayaraq “Qatıqlıq” ideyası ilə çıxış edən Aynur Bəşirova, beşinci yeri isə köhnə karton kağızlardan istifadə edərək kiçik ev hazırlayan Aysu Məhərrəmli qazanıb.

Xüsusi mükafatlar Sona Məhərrəmova, Eldar Həmidov, Rasim Mahmudov, Murad Şamxallı, Ramin Əkbərov, Səid Əliyev, Banuçiçək Qurbanova, Günel Hüseynli və Xəyalə Məmmədovaya təqdim olunub.

Ekologiya və Təbii Sərvətlər Nazirinin müavini Firdovsi Əliyevin sözlərinə görə, “Özün yarat” platforması yüzlərlə insanı yaradıcı və maraqlı həll yolları ilə təkrar istifadənin təşviqi üçün bir araya gətirib. Onların bu həll yolları tullantılara yeni həyat verib. Bu, həm xammal kimi iqtisadi cəhətdən səmərəlidir, həm də ətraf mühiti ekoloji yükdən qoruyur.

“Özün yarat” platforması, zərərli tullantıları azaltmaq və ətraf mühitimizi qorumaq məqsədilə insanları təkrar istifadəyə dair yaradıcı fikirlərini bölüşməyə təşviq etmək üçün 2 ay əvvəl Avropa İttifaqının dəstəyi ilə təsis edildi. Platformaya böyük maraq oldu və müsabiqəyə 200-dən çox iş təqdim edildi. Bu isə Azərbaycan xalqının incəsənət və əl işlərində olan istedadından və təbiəti qorumaq barədə qərarlılığından xəbər verir. Bu layihənin əsasında duran mesaj odur ki, dəyişiklik evdən başlayır və hər birimiz təbiətə qayğı missiyasında digərlərinə nümunə olmalıyıq”, – deyə Aİ-nin Azərbaycandakı səfiri Kestutis Yankauskas bildirib.

BMTİP-nin rezident nümayəndəsinin müavini Çaru Bist qeyd edib ki, COVID-19 pandemiyası milyonlarla insanın həyatını olduqca çətinləşdirib. Lakin bu çətinliklər öz bərabərində yeni bacarıqlara yiyələnmək, eləcə də daha yaşıl və daha dayanıqlı şəkildə bərpa üçün hərəkətə keçməyə fürsət olub: “Dayanıqlı inkişafa yol açmaq üçün hər birimiz daha çox iş görməliyik. Biz bunu dairəvi iqtisadiyyata üz tutaraq edə bilərik. Bu növ iqtisadiyyatda məhsullar hazırlanır, istifadə edilir, emal olunur və yenidən istifadəyə verilir. Gənc azərbaycanlıların “Özün yarat” platformasında nümayiş etdirdiyi bacarıqlar həqiqətən ilhamlandırıcıdır”.

Qeyd edək ki, “Özün yarat” platforması Avropa İttifaqının maliyyələşdirdiyi və BMT-nin İnkişaf Proqramının həyata keçirdiyi, Şərq Tərəfdaşlığı regionunun altı ölkəsində iqlim fəaliyyətinin sürətləndirilməsinə kömək məqsədi daşıyan EUforClimate regional təşəbbüsünün bir hissəsi olaraq istifadəyə verilib.