Səhiyyə Nazirliyi, BMTİP və “Equinor” şirkəti COVID-19 ilə birgə mübarizəsində rəqəmsal səhiyyəyə təkan verir
Norveçin “Equinor” enerji şirkəti Azərbaycanda COVID-19 pandemiyası zamanı səhiyyə işçiləri üçün yaradılmış rəqəmsal səhiyyə platformasının yenilənməsi üçün 25 min ABŞ dolları məbləğində yatırım edib.
Bu barədə BMT-nin İnkişaf Proqramının rezident nümayəndəsi Alessandro Frakassetti və “Equinor Apsheron AS”nin ölkə üzrə rəhbəri Favad Quraişinin bugünkü görüşü zamanı elan edilib. BMT-nin İnkişaf Proqramının Bakıdakı nümayəndəliyindən Frame.az-a bildirilib ki, görüşdə Azərbaycanda dayanıqlı inkişafla bağlı irəliləyiş üçün gələcək əməkdaşlıq imkanları ilə bağlı Anlaşma Memorandumu imzalanıb.
Onlayn platforma Səhiyyə Nazirliyi tərəfindən BMT-nin İnkişaf Proqramının dəstəyi ilə hazırlanıb və ölkəyə pandemiya ilə mübarizədə dəstək olmaq məqsədi daşıyır.
Platforma səhiyyə işçilərinə ödənişsiz onlayn təlimlər və sertifikasiya proqramları təklif edir. Hazırda platformada 55 kurs mövcuddur və təlim mövzularına infeksiyaların qarşısının alınması, COVID-19 və digər kəskin tənəffüs infeksiyalarının diaqnozu və müalicə olunması, eləcə də bir sıra digər tədris resursları daxildir. Bu günə qədər 500 səhiyyə işçisi kurslar üçün qeydiyyatdan keçib.
“Equinor” şirkəti tərəfindən göstərilən əlavə maliyyə dəstəyi səhiyyə işçilərinin cari dövrdə ehtiyacı olduğu 4 əlavə kurs üçün istifadə olunacaq: İntensiv terapiya şöbəsində mexaniki ventilyasiya və tənəffüs dəstəyi; Çətin intubasiya da daxil olmaqla, müxtəlif intubasiya texnikaları; Respirator müalicə və tibbi palatalarda oksigen dəstəyi; COVID-19 xəstələrində antibiotik müalicəsinin tətbiqi.
Kurslar Səhiyyə Nazirliyi və BMTİP tərəfindən hazırlanacaq və yekunda kursları uğurla tamamlayan tibb işçilərinin sertifikatlaşdırılması üçün kursda əldə edilən nəticələr nəzərə alınacaq. Bundan əlavə, komandalar tibb işçilərinin ən ağır COVID-19 hallarını aradan qaldıra bilməsinə və həyatını xilas edə bilməsinə hazırlıq məqsədilə simulyasiya platforması üzərində işləməyə başlayıblar.
BMTİP-nin rezident nümayəndəsi Alessandro Frakassetti bu təşəbbüsü, ictimai səhiyyə xidmətlərinin inkişafı istiqamətində özəl sektorun görə biləcəyi işlərə nümunə olaraq göstərib.
“Bizneslərin dəstəyi, dövlət və özəl sektorun əməkdaşlığı COVID-19-a qarşı dayanıqlı cavab tədbirlərinin təşkil olunması və daha yaxşı bərpa işlərinin təmin olunması baxımından çox vacib faktorlardır. Bizim bu gün yatırım etdiyimiz yeniliklər daha dayanıqlı cəmiyyətlər qurmağımıza kömək edəcək”, – deyə Frakassetti qeyd edib
“Şübhəsiz ki, COVID-19 pandemiyası bütün dünyada insanlar üçün ciddi çətinliklər yaratdı. Bu gün insanların qayğısına qalmaq heç vaxt olmadığı qədər önəmlidir. Qlobal fövqəladə vəziyyətin miqyası həddindən artıq böyükdür və bu, fərdləri və cəmiyyətləri ciddi təzyiqə məruz qoyur. BMTİP-nin dəstək olduğu bu layihəyə bizim də töhfə verməyimiz “Equinor” şirkətinin COVID-19 pandemiyasına qarşı cavab tədbirlərinə necə dəstək ola biləcəyinin aydın nümunəsidir”, – deyə “Equinor” şirkətinin Azərbaycan üzrə rəhbəri Favad Quraişi bildirib.
