Türk Hava Yolları və BMT-in Sivilizasiyalar Alyansı ortaq platforma yaradır
Türk Hava Yolları (THY) birbaşa missiyasını həyata keçirməklə yanaşı, həm də cəmiyyətin müxtəlif hədəflərə nail olması üçün dünya brendləri, təşkilatlar və QHT-lərlə əməkdaşlıq edir.
Aviaşirkətdən Frame.az-a verilən məlumata görə, THY BMT-nin Sivilizasiyalar Alyansı ilə əməkdaşlığa dair müqavilə imzalayıb. “Sülh naminə idman mükafatları” adlı layihənin imzalanma mərasimi 24 sentyabr tarixində Nyu-Yorkda, BMT-nin qərargahında reallaşıb.
Mərasimdə Türkiyə prezidenti Rәcәb Tayyib Әrdoğan və BMT-nin Baş katibi Antonio Quterreş iştirak edib. Müqaviləni Türk Hava Yolları tərəfindən şirkətin idarə heyəti və icraçı komitəsinin rəhbəri İlker Aycı və BMT-nin mədəniyyətlər ittifaqı üzrə ali nümayəndəsi Miqel Moratinos imzalayıblar.
Türk Hava Yolları dünya ictimaiyyətinin diqqətini çəkmək üçün BMT-nin Sivilizasiyalar Alyansı ilə birlikdə insanlar və xalqlar arasında sülh mədəniyyətini təbliğ etmək missiyasını öz üzərinə götürür. “Sülh naminə idman mükafatları” adlı ortaq layihə idmanın birləşdirici və ilhamlandırıcı gücündən yararlanaraq, insanlar arasında sülhsevər cəmiyyətin təbliği məqsədini daşıyır. Layihə çərçivəsində beynəlxalq münsiflər heyəti tərəfindən seçilmiş şəxslərə “Sülh və inkişaf naminə idman” mükafatları təqdim olunacaq. İdman, incəsənət və biznes aləminin aparıcı adları qlobal imkanlar və problemlərə diqqət çəkmək üçün bir araya gələcəklər.
İmzalanma mərasimində çıxış edən Türk Hava Yolları-nın idarə heyəti və icraçı komitəsinin rəhbəri İ.Aycı bildirib ki, təmsil etdiyi şirkət 126 ölkənin 316 məntəqəsinə uçuşlar həyata keçirərək daşınma funksiyasını uğurla yerinə yetirir. THY həm də Şərqlə Qərb arasında körpü rolunda çıxış edir: “Müxtəlif brendlər, təşkilat və QHT-lərlə çalışaraq, fərqli cəmiyyətləri və mədəniyyətləri birləşdiririk. Bu missiyamızı daha da uğurla həyata keçirmək üçün innovativ və perspektivli layihələr üzərində işləyirik. BMT-nin Sivilizasiyalar Alyansı ilə birgə layihəmizin imzalanma mərasimində prezident Rəcəb Tayyib Ərdoğanın və BMT-nin Baş katibi Antonio Quterreşin iştirakından qürur duyuruq. Həm yerli, həm də qlobal səviyyədə idman dəstəkliyicisi kimi tanınan Tük Hava Yolları olaraq, biz idmanın birləşdirici gücünə inanırıq. Buna görə də idmanın dəstəyi ilə 2030-cu ilə qədər dayanıqlı inkişafın 17 məqsədinə çatacağımıza əminik. “Sülh naminə idman mükafatları” layihəsinin ortaq tərəfdaşı olaraq, missiyamızın bütün hədəflərinə çatacağına, dünya ictimaiyyətinin marağını çəkəcəyinə əminik”.
Bu ilin fevral ayında “Türk Hava Yolları”nın İstanbuldakı qərargahında keçirilmiş görüş əsasında şirkət və BMT-nin Sivilizasiyalar Alyansı arasında bir neçə layihənin müzakirəsi aparılıb. THY-nin idman sahəsinə verdiyi dəstək nəzərə alınaraq, ortaq layihənin də qeyd olunan sahəni əhatə etməsi razılığı əldə olunub. Tərəflər “Sülh naminə idman mükafatları” adlı layihə çərçivəsində əməkdaşlığa dair razılaşıblar. Sülh, qarşılıqlı anlaşma və dözümlülük təbliğ edən idman dayanıqlı inkişafın 17 hədəfinə çatmaqda ən universal alətdir.
Türk Hava Yolları və BMT-nin Sivilizasiyalar Alyansı dayanıqlı inkişaf naminə dövlət və özəl biznes arasında tərəfdaşlıq əlaqələrinin əhəmiyyətini əyani olaraq göstərir. Aviaşirkət layihənin kommunikasiya və media strategiyasında fəal iştirak edərək, onun həm yerli, həm də qlobal səviyyədə auditoriyasının genişlənməsi üçün çalışacaq.
