“Uber” və “Yandex” gedişlərin online sifarişi bizneslərini birləşdirir

“Yandex” və “Uber” şirkətləri Rusiya, Azərbaycan, Belarus, Gürcüstan, Ermənistan və Qazaxıstan ərazisində gedişlərin online sifarişi bizneslərini bir şirkət daxilində birləşdirilməsinə dair saziş imzalayıblar.

Sazişin şərtlərinə əsasən,“Uber”və“Yandex” yeni şirkətin dəyərini $3,725 mlrd qiymətləndirərərk şirkətə$225 mln və $100 mln məbləğində sərmayə yatıracaq. Bu yatırımları və mümkün ola bilən düzəlişləri nəzərə almaqla müqavilənin bitməsi zamanı şirkətin 59,3%-i “Yandex”ə, 36,6%-i “Uber”ə, 4,1%-i isə şirkətin əməkdaşlarına məxsus olacaq.

Yeni şirkətin “Yandex”in xəritəçəkmə və naviqasiya xidmətləri, eyni zamanda, axtarış sistemləri üzrə bilik və texnologiyaları, habelə “Uber”in gediş sifarişləri və online xidmətlər üzrə dünya liderliyi təcrübəsindən yararlanmaq imkanı olacaq. Bu da öz növbəsində istifadəçilərin və sürücülərin bütün tələbatlarını ödəməyə, həmçinin şəhər və regionlarda nəqliyyat infrastrukturunu inkişaf etdirməyə kömək edəcək və dinamik şəkildə irəliləyən və sabit biznes qurmaq üçün şərait yaradacaq.

Sazişin bağlanmasından sonra həm “Yandex.Taksi”, həm də “Uber”tətbiqləri gediş sifarişlərini online şəkildə həyata keçirmək üçün əvvəlki qaydada istifadəçilərin ixtiyarında olacaq. Eyni zamanda, taksoparklar və sürücülər vahid texnoloji platformadan istifadəyə keçəcəklər ki, bu da avtomobil sifarişlərinin sayını artırmağa, onların çatma vaxtını və avtomobilin boş-boşuna hərəkətini azaltmağa, etibarlılığı artırmağa və xidmətin ümümilikdə əlçatan olmasına imkan yaradacaq.

“Bu birləşmə sadəcə şirkətlər üçün deyil, eləcə də istifadəçilər, sürücülər və şəhərlər üçün sərfəlidir. Bu saziş “Uber”in regionda müstəsna irəliləyişini təsdiqləyir və gələcəkdə beynəlxalq dayanıqlı biznesin qurulmasına da bilavasitə təsir edəcək”, – deyə “Uber”in Avropa, Yaxın Şərq və Afrika regionu üzrə rəhbəri Pyer-Dimitri Qor-Koti (Pierre-Dimitri Gore-Coty) bildirib.

Saziş “Uber” və “Yandex” şirkətlərinin Direktorlar Şurası tərəfindən təsdiqlənib. Hazırda tənzimləyici orqanlar tərəfindən təsdiqlənməsi gözlənilir, sazişin tam bağlanması isə 2017-ci ilin IV rübünə planlaşdırılır.

Frame.az