Oskar mükafatına namizəd olan yapon cizgi filmi təqdim olunub
Nizami Kino Mərkəzində “Hava Övladı” animasiya filminin təqdimatı keçirilib. Təqdimatda Yaponiyanın ölkəmizdəki səlahiyyətli səfiri də iştirak edib.
Filmin rejissoru və ssenaristi “Sənin adın”, “Buludların Ardınca”, “Gözəl Sözlər Bağı”, “Saniyədə 5 santimetr” və.s animasiya filmlərinin müəllifi olan məşhur yapon rejissoru Makoto Sinkay-dır.
Film Hodaka adlı gənc oğlanın və Hina adlı gənc qızın hekayəsindən bəhs edir.
Hodaka Tokio şəhərinə gəlib burada iş axtarır. Çətinliklə özünə qəzet redaksiyalarının birində iş tapır. Tokio-da fasiləsiz yağan yağışlar isə səngimək bilmir. Şəhər get-gedə iflic olmaq üzrədir. Günlərin bir günü səs-küylü paytaxtın arxasında Hodaka, Hina adlı bir qızla tanış olur. Yaşayış vəziyətləri çətin olan Hina, kiçik qardaşı ilə birlikdə yaşayır, lakin nikbinliyini və ruh möhkəmliyini heç vaxt itirmir. O həm də sirli bir gücə sahibdir.
Animasiya filmi gənc oğlanla qızın hekayəsindən bəhs etməklə yanaşı Tokionun gözəllikləri, təbiət peyzajları ilə zəngindir.
Qeyd edək ki, Makoto Sinkay-ın bu filmi “Xarici dildə ən yaxşı film” nominasiyasında Yaponiyadan OSKAR Mükafatına namizəddir.
Əminliklə qeyd edə bilərik ki, bu animasiya filmi dünya animasiya filmləri tarixində yeni bir istiqamətdir və o layiq olduğu mükafatı mütləq alacaqdır.
