Bakıda “Yer ünsürü”nə həsr olunmuş Azerbaijan Fashion Week-in 18-ci mövsümü keçirilir
24–25 may tarixlərində Bakı şəhərində ilin ən çox gözlənilən dəb hadisələrindən biri — Azerbaijan Fashion Week-in 18-ci mövsümü keçirilir. Tədbir Azərbaycan Respublikası Mədəniyyət Nazirliyi yanında fəaliyyət göstərən YARADICI — Mədəni və Yaradıcılıq Sənayelərinin İnkişafı Mərkəzinin dəstəyi ilə təşkil olunur.
AFW-in hər mövsümü təbiətin bir ünsürünə həsr olunur və bu yanaşma təkcə vizual deyil, həm də fəlsəfi bir konsepsiyaya çevrilir. Mövsüm mədəniyyət, moda və kimlik anlayışlarının vəhdətini ifadə edir. 2025-ci il mövsümünün mövzusu Yer ünsürüdür — dayanıqlılığın, dərinliyin və mirasın simvolu. Mövsümün sloqanı — “The Spirit of Stone” (Daşın Ruhu) — dizaynda təbii forma, struktur, material və daxili gücə diqqəti ön plana çəkir.
Mövsümün əsas podium məkanı “Daş Salnamə Muzeyi” (The Stone Chronicle Museum) seçilib — mövsümün ruhuna tam uyğun, monumental və simvolik bir məkan.
Azerbaijan Fashion Week çərçivəsində yalnız podium nümayişləri deyil, həm də təhsil təşəbbüsləri, yaradıcılıq görüşləri və brendlərin kolleksiyalarını təqdim etdiyi showroom proqramı həyata keçirilir. Hyatt Regency Baku otelində keçirilən showroom-da yerli və beynəlxalq brendlərin işləri təqdim olunur. Showroom iştirakçıları arasında Octavio Pizarro (Fransa), Naiyl Baikuchukov (Qazaxıstan), Ianis Chamalidy, Leffers, Lilia Fisher, Yulia Kiseleva və EDGE (Rusiya) yer alır.
24 may tarixində AFW podiumunda Naiyl Baikuchukov, Reve, Malique, Tsyhkovskyi və Aksona kimi dizaynerlər çıxış edəcək. Həmçinin Menzer Zakizade Fashion School proqramının iştirakçılarının işləri nümayiş olunacaq. Bu kolleksiyalar həm dizaynerlərin fərdi estetik baxışını, həm də mövsümün ümumi əhval-ruhiyyəsini əks etdirəcək. Günün sonunu isə etnik yanaşması, ənənəvi formalar və sənətkarlıq texnikalarına olan diqqəti ilə tanınan Natavanın kolleksiyası bağlayacaq. Onun işləri milli irsi müasir estetikayla birləşdirərək kimlik və mənsubiyyətin dərinliyini vurğulayır — bu mövsümün mahiyyətini ən yaxşı ifadə edən təqdimatlardan biri olacaq.
25 may tarixində isə tanınmış beynəlxalq dizaynerlərin solo nümayişləri keçiriləcək. Podiumda Zemfira Jaffar Couture, Letters brendi, həmçinin mövsümün xüsusi qonaqları olan Octavio Pizarro (Paris) və Yanis Chamalidi (Sankt-Peterburq) öz kolleksiyalarını təqdim edəcəklər. Onların dizayna yanaşması — kütür texnikası, dərin mədəni kontekst və forma üzərində müasir düşüncənin harmoniyasıdır.
Bu mövsümdə xüsusi diqqət təhsil proqramlarına yönəldilib. YARADICI mərkəzinin dəstəyi ilə UNEC Dizayn Məktəbi, Mədəniyyət və İncəsənət Universiteti və gənc dizaynerlər üçün bir sıra mühazirə və ustad dərsləri təşkil olunub. Tədbirdə yerli və beynəlxalq mütəxəssislər — fotoqraflar, moda prodüserləri, stilistlər və sənaye ekspertləri, o cümlədən Adil Yusifov, Natavan Əliyeva, Nadejda Kojevnikova və Andrey Artonov öz təcrübələrini bölüşüblər. İştirakçılar suallar vermək və peşəkar məsləhətlər almaq imkanı qazanıblar.
AFW-2025-in baş informasiya tərəfdaşı və nümayişlərin təşkilatçısı HELLO! jurnalına məxsusdur.
2015-ci ildən etibarən Azerbaijan Fashion Week Avropa, MDB və Asiyadan olan dizaynerləri, media nümayəndələrini və ekspertləri bir araya gətirən beynəlxalq mədəniyyət platforması statusunu qoruyur. Hər mövsüm yalnız estetik meyilləri əks etdirmir, eyni zamanda moda, mədəniyyət və kimlik arasında dialoq üçün real meydançaya çevrilir.
