Beynəlxalq Nəqliyyat Forumunun “İcazə blankları”nın bölgüsü yeni qaydalarla aparılıb

Beynəlxalq Nəqliyyat Forumunun çoxtərəfli illik icazələrinin milli avtodaşıyıcılar arasında bölgüsünün yeni mexanizmi müəyyən edilib. Məqsəd icazə blanklarının bölgüsü prosesində ictimai iştirakçılığın təmin edilməsi, şəffaf və ədalətli bölgü mühitinin yaradılmasıdır.

Rəqəmsal İnkişaf və Nəqliyyat Nazirliyindən Frame.az-a verilən məlumata görə, həmçinin beynəlxalq avtomobil daşımaları bazarına çıxışın tənzimlənməsində Azərbaycanın da qoşulduğu Avropa Nəqliyyat Nazirləri Konfransının Çoxtərəfli Kvota Sistemi çərçivəsində həyata keçirilən beynəlxalq avtomobil daşımaları üzrə Keyfiyyət Xartiyasının tələblərinin icrasına nail olmaqdır. Eyni zamanda daha yüksək ekoloji və təhlükəsizlik standartlarına uyğun olan nəqliyyat vasitələrinin idxalının və daşımalarda istifadəsinin stimullaşdırılması da əsas hədəflərdəndir.

Yeni qaydaya əsasən daşıyıcılar çoxtərəfli illik icazə blankları almaq üçün avtonəqliyyat vasitələrinin mülkiyyət və ya istifadə hüququnu təsdiq edən sənədlərin surətini, ekoloji sertifikatın surətini və avtomobili idarə edəcək sürücülərin əmək müqaviləsi bildirişlərinin qeydiyyata alınmasını təsdiq edən sənədi təqdim etməlidirlər.

Dekabr ayı üzrə aparılan təhlillərə əsasən, 15 şirkətin həmin sənədləri tam şəkildə təqdim etdiyi müəyyən olunub. Təqdim edilən sənədlər əsasında bölgü həyata keçirilib. Növbəti mərhələdə müvafiq sənədləri təqdim edəcək digər daşıyıcıların müraciətlərinə baxılacaq.

Qeyd edək ki, “İcazə blankları” ölkələr arasında razılığa əsasən daşımaların həcminə uyğun müəyyən olunan və beynəlxalq yükdaşımalarını icra etmək üçün tətbiq edilən sənəd növüdür. Bu sənəd ölkələr arasında daşımaların həcmindən asılı olaraq, kvota əsasında müəyyən olunaraq paritet qaydada mübadilə edilir.

Bir cavab yazın

error: Mətndən istifadə etmək qadağandır!
%d bloggers like this: