“Insun” Yaşam Mərkəzinin rəsmi açılışı oldu
Azərbaycanda müxtəlif sosial statusa sahib insanların hərtərəfli inkişafı üçün xidmətlər təklif edən “Insun” Yaşam Mərkəzinin rəsmi açılışı baş tutdu.
Açılış mərasimini açıq elan edən “Insun” Yaşam Mərkəzinin təsisçisi Nigar Ələsgərova yerli bazarda bu kimi layihəyə böyük ehtiyac olduğunu vurğuladı.
“Bu gün insanların böyük əksəriyyəti işləmək, görüşmək, gəzmək və yaşamaq üçün şəhərin mərkəzinə axın edir. Gündəlik qayğılar, şəhərin səsli-küylü küçələri, stressli yolları və ucalan binaları insanları sanki daim hərəkətdə olan bir çarxın içərisinə salır. Belə bir mühitdə yaşamaq və çalışmaq enerji tükənməsi və həyatın monotonlaşmasına gətirib çıxarır. Biz bunları kənardan müşahidə etdiyimiz və ehtiyacı gördüyümüz üçün belə bir mərkəzi yaratmağı qərara aldıq. İnsan daim özünü mərkəzə qoymalı, enerjisini bərpa etmək üçün beynində olan sualları, tərəddüdləri, neqativ emosiyaları xaric etməlidir. Biz də “Insun” Yaşam Mərkəzi olaraq insanları sürətlə axan həyatdan, texnologiyadan uzaqlaşdırıb öz həyatlarına yenidən baxmalarını, inkişaf etdirmək istədikləri nöqtələri düzəltməyə çağırırıq.”
Yaşam Mərkəzinin xidmətləri haqqında məlumat verən mərkəzin direktoru Təhminə Cəfərova bundan sonra onları uzun və maraqlı bir yol gözlədiyini qeyd etdi.
“Azərbaycanda belə bir mərkəzin fəaliyyətə başlaması həm fərdi həm də korporativ dəyərləri yeni bir mərhələyə daşıyacaqdır. Psixologiya, yoqa, dietaloloq, theta healing, access bars, kouçinq, mentorluq, qrup terapiyaları kimi xidmətlərin bir mərkəz altında birləşdirilməsi bu xidmətlərdən faydalanmaq istəyənləri anında doğru istiqamətə yönləndirməyə imkan verəcək. Zamanın dəyərli olduğu bir dövrdə fərdi inkişafını hədəfləyən şəxslər, İnsun Yaşam Mərkəzi vasitəsilə proseslərə yeni və təmiz pəncərədən baxa biləcəklər. Biz bunun üçün bütün gücümüzü səfərbər etmişik.
Təhminə xanım çıxışı zamanı mərkəzin təqdim etdiyi xidmətlərdən şirkətlərin də faydalana biləcəyini bildirdi.
“Təqdim etdiyimiz xidmətlər şirkətlər üçün yeni bir loyallıq proqramı olmalıdır. Yerli bazarda fəaliyyət göstərən şirkətlərin rəhbərləri öz əməkdaşlarını təkcə toxuna bilən hədiyyələrlə deyil, onları mənəvi olaraq dirçəldəcək, psixoloji vəziyyətini yaxşılaşdırılması istiqamətində də addımlarla atmalıdır. Biz çox istərdik ki, şirkət rəhbərləri və həmin şirkəti təmsil edən əməkdaşlar üçün fərqli bir dəyər formalaşdırıb, yaşam istiqamətlərində dəyişikliklərə səbəb olaq. Bunun üçün yerli və türk mütəxəssisləri ilə birlikdə fərdi təlim proqramları da formalaşdırmağa hazırıq.”
Sahənin inkişafı ilə bağlı atılacaq addımlarla bağlı məsələyə də toxunan Təhminə xanım Yaşam Mərkəzinin bu istiqamətdə Türkiyənin bir neçə əsas şirkəti ilə birgə əməkdaşlıq edəcəklərini söylədi.
“Azərbaycanda bu sahələr üçün geniş imkanlar mövcuddur. Təbii ki, bir mərkəz olaraq bütün bazarı əhatə edə bilmərik. Biz yerli bazarda böyük bir potensial görürük. Yaşam Mərkəzi olaraq bu potensialı iqtisadi və sosial səmərəliliyə çevirmək üçün bir çox sahələr üzrə təlimlər keçirməyi də nəzərə almışıq. Təlimlər həm gələcək karyerasını bu sahələrlə bağlayıb özünə və ətrafdakılarına faydalı olmaq istəyənlər, həm də şirkətlər üçün nəzərdə tutulub. Hal-hazırda şirkətlərdən gələn sorğular üzərində işləyirik. İşlərin aktiv fazasına növbəti aydan başlamağı planlaşdırırıq.”
Qeyd edək ki, “lnsun” Yaşam Mərkəzinin açılış tədbirində 300-dən çox qonaq iştirak etmişdir. Dəvət olunanlar sırasında ölkənin dövlət rəsmiləri, şirkət rəhbərləri, incəsənət adamları və digər şəxslər yer almışdır. Nizami kino mərkəzində keçirilən tədbirdə Türkiyədən “Açık Beyin” mərkəzinin təsisçisi Prof. Dr. Sinan Canan, Neyroelm və Psixologiya üzrə mütəxəssis Gülferi Yıldırım, “Habit” şirkətinin təsisçisi İlker Çağlayan, “Türkiye Profesyonel Koçluk Merkezi” təsisçisi Tülay Tuğluer, sagliklihoca.com, “Sağlıklı Hoca” adlı youtube kanalı, həmçinin “8 Haftada Dik Durma Sanatı” kitabının müəllifi Mahmut Talha Sağlıklı və fəxri qonaq qismində psixiatr, psixoterapevt, şair və yazıçı olan, Prof. Dr. Kemal Sayar da iştirak etmişdir.
