Kaspersky yeni Apple məhsullarının təqdimatı ilə meydana çıxan yeni onlayn fırıldaqçılıq sxemləri barədə xəbərdarlıq edir

“Sərfəli” aksiyalar. Belə bir sxemə misal olaraq, demək olar ki, 40% endirimlə iPhone 16-nı əvvəlcədən sifariş etmək üçün saxta təklifi göstərmək olar. Xüsusilə, aşkar edilmiş fişinq resurslarından birində ziyarətçilərə “ən son texnologiyalardan ilk zövq alanlardan biri olmaq” təklif olunur. Smartfonların qiymətləri olduqca səxavətlidir: Pro Max modelini guya 499 dollara almaq olar. Bununla belə, əgər şəxs “səbətə əlavə et” və ya “al” düyməsinə klikləsə, saxta hesab-faktura yaranacaq. Əfsanəyə görə, fakturada hətta vergilər və göndərmə xərcləri də nəzərə alınır. Qurban yalnız ödənişi və çatdırılma üçün məlumatları təqdim etməlidir. Ancaq nəticədə pul şəxsi məlumatlarla birlikdə təcavüzkarların əlinə keçəcək, sonra isə ola bilsin qaranlıq şəbəkədə satılacaq.

“Texniki dəstək” xidmətləri. Kaspersky mütəxəssisləri həmçinin smartfonu iOS-un ən son versiyasına yeniləməkdə köməklik etdiyi iddia edilən saxta resurs aşkar edib. O, həmçinin cihazın harada olduğunu öyrənmək üçün iPhone-un itirilməsi və ya oğurlanması haqqında məlumat verməyinizi təklif edir. Bundan əlavə, veb-saytda uzaqdan texniki dəstək xidmətləri üçün elan var. Amma xidmətdən istifadə etmək üçün şəxsdən Apple ID-si ilə daxil olmaq tələb olunur. Belə bir hesaba aid şəxsi məlumatları ələ keçirən təcavüzkarlar qurbanın adı, e-poçt ünvanı, həmçinin iCloud-dan faylları – fotoşəkilləri, sənədləri, ehtiyat nüsxələri daxil olmaqla müxtəlif məlumatlara giriş əldə edəcəklər. Bununla yanaşı, onlar istifadəçi adından icazəsiz alış-veriş edə və Apple Wallet-də pul əməliyyatlarını idarə edə biləcəklər. Bəzi hallarda fırıldaqçılar hətta cihazı bloklaya və fidyə tələb edə bilərlər.

“Fişinqin kibertəhdidlərin ən çox yayılmış növlərindən biri olduğunu tez-tez deyirik. Əgər istifadəçilər artıq fişinq e-poçtlarına bu və ya digər formada hazırdırsa, onda məşhur qadcetlərin mövzusundan istifadə edən fişinq saytları istifadəçilərin sayıqlığını azalda bilər. Hər zaman qeyri-adi səxavətli onlayn təkliflərə tənqidi yanaşmaq və fişinq linkinə klikləməyin qarşısını alacaq etibarlı təhlükəsizlik həllindən istifadə etmək lazımdır”, deyə Kaspersky-nin Azərbaycandakı rəsmi nümayəndəsi Müşviq Məmmədov bildirir.

Müxtəlif növ onlayn fırıldaqçılıq sxemlərindən qorumaq üçün Kaspersky mütəxəssisləri tövsiyə edir:

• e-poçtda, sosial şəbəkələrdə və messencerlərdə şübhəli mesaj linklərinə keçid etməyin;

• saytın URL-inə diqqət yetirin: fırıldaqçılar çox vaxt real resurslarla demək olar ki, eyni görünən saxta resurslar yaradırlar;

• məxfi məlumat və ya Apple ID məlumatlarını təqdim etməyiniz istənilən mesajlara və resurslara qarşı ehtiyatlı olun;

• mümkün olduqda bütün xidmətlərdə ikifaktorlu autentifikasiyanı aktivləşdirin;

• zərərli proqramı yükləməyin və ya fişinq resursuna keçid etməyin qarşısını alacaq, məsələn, Kaspersky Premium kimi etibarlı təhlükəsizlik həlli quraşdırın. 2024-cü ildə o, “AV-Comparatives” tərəfindən keçirilən anti-fişinq sınağında ən yüksək balı toplayıb.

2023-cü il ərzində Kaspersky həlləri müxtəlif parametrlər üzrə təhlükəsizlik texnologiyalarının iştirakı ilə keçirilən 100 müstəqil sınaqda iştirak edib, 93 dəfə birinci yeri tutub.